បុរសម្នាក់រៀនបើកឡាន ជ្រុលចង្កូតឡើងខឿន បុកជញ្ចាំងផ្ទះប្រជាពលរដ្ឋ
រាជធានីភ្នំពេញ ៖ សមត្ថកិច្ចមូលដ្ឋាន បានឱ្យដឹងថា បុរសម្នាក់រៀនបើករថយន្តទាំងយប់ រួចក៏បានជ្រុលចង្កូតឡើងខឿនបុកជញ្ចាំងផ្ទះ របស់ប្រជាពលរដ្ឋ នៅម៉ោង ១០និង៤០នាទីយប់ថ្ងៃទី៣ ខែកញ្ញា ឆ្នាំ២០២៤ នៅតាមបណ្តោយផ្លូវលេខ២៨៨ កែង៥១ ស្ថិតក្នុងសង្កាត់បឹងកេងកង១ ខណ្ឌបឹងកេងកង រាជធានីភ្នំពេញ។
ប្រភពព័ត៌មានពីកន្លែងកើតហេតុ បានឱ្យដឹងថា មុនពេលកើតហេតុ គេបានឃើញបុរសម្នាក់ កំពុងឡើងបើកបររថយន្ត TOYOTA GRANVIA ពណ៌ស ពាក់ស្លាកលេខ កម្ពុជា AU-0527 ដោយដំបូងរថយន្តខាងលើ ឈប់នៅក្បែរផ្ទះកើតហេតុប្រមាណ ២០ម៉ែត្រ ភ្លាមៗនោះបុរសខាងលើ ក៏ឡើងបើករថយន្ត ក្នុងគោលបំណងរៀនបើកបរ ក៏ស្រាប់តែរេចង្កូត ឡើងខឿនផ្ទះប្រជាពលរដ្ឋ រួចក៏បុកដើមឈើបាក់អស់មួយដើមថែមទៀត។
គួរបញ្ជាក់ថា ករណីគ្រោះថ្នាក់ចរាចរណ៍ខាងលើនេះ មិនបង្កឱ្យនរណាម្នាក់រងរបួសនោះទេ ។
ក្រោយកើតហេតុ សមត្ថកិច្ចមូលដ្ឋានបានទាក់ទងទៅកាន់សមត្ថកិច្ចជំនាញចរាចរណ៍ ដើម្បីចុះមកធ្វើការវាស់វែង ព្រមទាំងបាននាំខ្លួន ម្ចាស់រថយន្តទៅប៉ុស្តិ៍ ដើម្បីធ្វើការពិនិត្យមើលជាតិអាល់កុល ខ្លាចក្រែងពិសាគ្រឿងស្រវឹង។ ចំណែករថយន្ត បានយកទៅរក្សាទុក នៅអធិការដ្ឋាននគរបាលខណ្ឌបឹងកេងកង ដើម្បីរង់ចាំម្ចាស់រថយន្តចូលខ្លួនទៅដោះស្រាយតាមនីតិវិធី នៅពេលក្រោយ៕ ប្រភព ៖ readnewstv
