ស្ត្រីវ័យចំណាស់ម្នាក់ ត្រូវក្រុមគ្រួសារ យកមកប្លុងចោល នៅមុខវិហារឥស្លាម ក្នុងសង្កាត់ព្រែកប្រា
រាជធានីភ្នំពេញ ៖ សមត្ថកិច្ចមូលដ្ឋានបានឱ្យដឹងថា ស្ត្រីវ័យជាង ៦០ឆ្នាំម្នាក់ ត្រូវបានសាច់ញាតិ ឱ្យម៉ូតូកង់បីដឹកយកមកប្លុងចោល បង្កឱ្យមានការភ្ញាក់ផ្អើលដល់ ប្រជាពលរដ្ឋ និងសមត្ថកិច្ចចុះអន្តរាគមន៍សួរនាំ នៅម៉ោង ១០យប់ ថ្ងៃទី៥ ខែកញ្ញា ឆ្នាំ២០២៤ នាទីតាំងទល់មុខវិហារឥស្លាម តាមផ្លូវ៣៦៩ សង្កាត់ព្រែកប្រា ខណ្ឌច្បារអំពៅ រាជធានីភ្នំពេញ។
ប្រជាពលរដ្ឋ រស់នៅម្តុំនោះ បានឱ្យដឹងថា មុនពេលកើតហេតុ គេឃើញម៉ូតូកង់បីឥណ្ឌាមួយគ្រឿង បានដឹកស្ត្រីចំណាស់ខាងលើ យកមកទម្លាក់ចោល នៅមុខវិហារឥស្លាម ហើយក៏បើកម៉ូតូទៅបាត់តែម្តងទៅ។
ប្រភពបន្តថា បន្ទាប់ពីឃើញបែបនេះ ប្រជាពលរដ្ឋ បានរាយការណ៍ជូនអាជ្ញាធរ និងសមត្ថកិច្ចមូលដ្ឋាន ឱ្យចុះទៅជួយអន្តរាគមន៍ និងពិនិត្យ ហើយបានឃើញស្ត្រីម្នាក់ កំពុងនៅដេកលើចិញ្ចើមផ្លូវ និងមានកាបូបខោអាវមួយ កង្ហារមួយគ្រឿង កន្ថោរមួយ និងទូរស័ព្ទដៃមួយគ្រឿងតែប៉ុណ្ណោះ។
សមត្ថកិច្ច បញ្ជាក់ថា ស្ត្រីវ័យចាស់ខាងលើ ត្រូវបានសាច់ញាតិដឹកតាមរថយន្តឈ្នួលចេញពី ខេត្តសៀមរាប មកភ្នំពេញ ហើយមកដល់ភ្នំពេញ ក៏បានឱ្យម៉ូតូកង់បីឥណ្ឌា ដឹកយកមកប្លុងចោលនៅផ្លូវ៣៦៩ ទល់មុខ វិហារឥស្លាម។
ពាក់ពន្ធ័ករណីនេះ សមត្ថកិច្ច បានទាក់ទងស្វែងរកសាច់ញាតិ ស្ត្រីខាងលើ រហូតដល់ម៉ោង ១២អធ្រាត្រ ក៏រកមិនឃើញ បន្ទាប់មក លោកមេប៉ុស្តិ៍ព្រែកប្រា ក៏សម្រេចយករថយន្តផ្ទាល់ខ្លួន ដឹកយកស្ត្រីវ័យចាស់រូបនេះ ទៅសម្រាកនៅមន្ទីរពេទ្យបង្អែកច្បារអំពៅ ជាបណ្ដោះអាសន្នសិន ដោយរង់ចាំស្វែងរកសាច់ញាតិ ជាបន្តទៀត ៕ ប្រភព ៖ readnewstv
