លោក សេង សារី ផ្ញើសារឆ្លើយតប សម្តេចតេជោ ករណីបែកធ្លាយសារសំឡេង និងការធ្វើចារកម្ម
ខ្លឹមសារទាំងស្រុង របស់លោក សេង សារី ៖
“ជូនចំពោះ ពុកជាទីគោរព!
ឥឡូវនេះ ពុកបានសារភាពហេីយថា ពុកជាអ្នកបញ្ចេញសារសំលេងនេះ។ ពុកកំទេចខ្ញុំ ចោលបានសម្រេចហេីយ។ ខ្ញុំដឹងមុនថា ថ្ងៃណាមួយពុក នឹងចាត់ការខ្ញុំ តាមវិធីនេះ។
ពុកដឹងទេ ក្រោយពីពុកគម្រាម និងសម្លុតខ្ញុំ នៅថ្ងៃសម្ពោធស្តាតមរតកតេជោ តែមួយម៉ោងប៉ុណ្ណោះ មានមនុស្ស របស់ពុក ៤នាក់ មកតាមចាប់ខ្ញុំនៅបាងកក តែសំណាងណាស់ខ្ញុំដឹងខ្លួនទាន់ ខ្ញុំចង់ប្រាប់ពុកថា ខ្ញុំ ភ័យណាស់។
ប៉ុន្មានថ្ងៃក្រោយមក ពុកតេមកខ្ញុំ យេីងនិយាយគ្នា បានច្រេីនណាស់ ហេីយពេលនោះ ខ្ញុំគិតក្នុងចិត្តថា ពុកគឺជាមនុស្សម្នាក់ ដែលពូកែនិយាយ និងបញ្ចុះបញ្ចូលខ្លាំងណាស់ ក្នុងចំណោមមនុស្សដែលខ្ញុំ បានជួប។ ពីរបីថ្ងៃក្រោយមកពុក បានស្នេីរឲ្យទៅធ្វេីជារដ្ឋមន្រ្តី អបប្រតិភូនាយករដ្ឋមន្រ្តី តែខ្ញុំបដិសេដ។ បន្ទាប់មក ពុកនិយាយថា ពុកចង់ជួយបង់ផ្តាច់ ថ្លៃធានាគារ ជំពាក់ថ្លៃផ្ទះឲ្យ។ ពេលនោះ ខ្ញុំចង់បដិសេធណាស់ តែក្នុងចិត្តខ្ញុំបារម្ភថា បេីមិនខ្ញុំបដិសេធ មិនយកលុយពុកម្តងទៀត គឺស្មេីនឹងប្រឆាំងពុក ខណៈដែលប្រពន្ធកូនខ្ញុំ កំពុងរស់នៅក្នុងស្រុកទាំងអស់។
ខ្ញុំ មិនចោទពុកថា នឹងធ្វេីបាបគ្រួសារខ្ញុំទេ តែខ្ញុំខ្លាចពុក ព្រោះបទពិសោធន៍កន្លងមក ស្អី ក៏ពុកហ៊ានធ្វេីដែរ។ បន្ទាប់មកពុក បន្តផ្តល់ថវិកា ឲ្យខ្ញុំសម្រាប់សិក្សាស្រាវជ្រាវ មួយខែមួយម៉ឺនដុល្លារ សរុប ១២ខែ ថវិកាទាំងនោះ មួយភាគធំ ខ្ញុំប្រេីសម្រាប់សិក្សាស្រាវជ្រាវ ដែលចំណាយលេីក្រុមអ្នកប្រមូលទិន្នន័យ និងចំណាយសម្រាប់មន្រ្តីស្រាវជ្រាវ ពីររូបទៀត ជាជនជាតិថៃ។
ពុក! ទោះបី ពុកចាត់ទុកខ្ញុំ ជាអ្នកបឹក្សាយោបល់ក៏ដោយ តែក្នុងចិត្តខ្ញុំ មានអារម្មណ៍ថា ខ្ញុំកំពុងផុង ក្នុងអន្ទាក់ចារកម្ម របស់ពុក។ ខ្ញុំព្យាយាមរកវិធីដេីរចេញពីអន្ទាក់ចារកម្ម របស់ពុកច្រេីនដងណាស់ ដោយផ្តួចផ្តេីមចង់បង្កេីត គណបក្សនយោបាយ ដែលមានពុក បានឧបត្ថម្ភលុយផង និងការទៅសហរដ្ឋអាមេរិក ដេីម្បីអាចជួបផ្ទាល់ជាមួយ មេដឹកនាំប្រឆាំង ដេីម្បីមានឱកាសប្រាប់រឿងរ៉ាវ រវាងខ្ញុំ និងពុកផង។ មានមិត្តភ័ក្ក្រ បានប្រាប់ថា ចង់ជួបនិយាយរឿងសំខាន់ជាមួយ សម រង្សុី គួរតាមរយ: ប៊ុត ប៊ុនតិញ ព្រោះលោក សម រង្សី គោរពលោកណាស់ តែខ្ញុំ បានជួបផ្ទាល់ហេីយ ខ្ញុំ ក៏ដូរចិត្តវិញ។ ពេលនោះ ខ្ញុំ ក៏បន្តលាក់រឿងនេះទៀត ដោយរង់ចាំឱកាសថ្មី។ ទោះបីយ៉ាងណាក៏ដោយ មកដល់ពេលនេះ ពុកកំទេចខ្ញុំ បានសម្រេចហេីយ ហេីយខ្ញុំ ក៏មិនដឹងថា ហេតុអ្វីពុក សម្រេចចិត្តធ្វេីបែបនេះដែរ។
ចង់ជម្រាបជូនពុកថា ចំនួនលុយដែលពុក ឲ្យខ្ញុំ មិនអាចប្រៀបធៀបជាមួយកេរ្ត៍ឈ្មោះ ដែលខ្ញុំបានប្រឹងសាងមកទាំងភ័យ ទាំងខ្លាច រយៈពេល ១០ឆ្នាំ ចុងក្រោយនេះបានទេ។ តែថ្ងៃនេះ យ៉ាងហោចណាស់ ខ្ញុំបានទទួលសេរីភាពពេញលេញ ហេីយ ខ្ញុំលែងមានអារម្មណ៍ ជាប់អាណានិគម ពុកទៀតហេីយ។
ចាប់នេះតទៅ ខ្ញុំសូមប្រកាស មិនធ្វេីជាអ្នកបឹក្សាយោល់ ជូនពុកទៀតទេ។ តែខ្ញុំ នៅសុំហៅពុក ថាពុក ព្រោះពុកជាមនុស្សទីមួយហេីយ ដែលខ្ញុំហៅថាពុក បន្ទាប់ពីឪពុកបង្កេីត របស់ខ្ញុំ។
បេីខ្ញុំមានឱកាស ត្រឡប់ចូលវិស័យនយោបាយវិញ ខ្ញុំ នឹងប្រឹងប្រកួតនយោបាយ ជាមួយពុក ហេីយបេីមិនឈ្នះពុកទេ កូនប្រុស របស់ពុក ដែលជានាយករដ្ឋមន្រ្តីបច្ខុប្បន្ន និងក្លាយជាមនុស្សបន្ទាប់ពីពុក។
អរគុណពុក ចំពោះចិត្តសណ្តោសរបស់ពុក ហេីយមេរៀនជីវិត និងមេរៀននយោបាយ ដែលពុកបានបង្រៀន ខ្ញុំពេលនេះ ខ្ញុំនឹងចងចាំទុកក្នុងចិត្ត របស់ខ្ញុំ ជារៀងរហូត។
ដោយក្តីគោរពពីចំងាយ ពុក!
ពីកូន សេង សារី
សារបន្ទាប់ ៖
គោរពជម្រាបសួរពុក!
សូមមេត្តាពុក បង្ហោះសារសន្ទនារវាងពុក ហេីយនិងខ្ញុំ ឲ្យបានកាន់តែឆាប់កាន់តែល្អ។ មកដល់ពេលនេះ គ្មានអ្វី ដែលត្រូវលាក់កំបាំងទៀតនេះទេ ហេីយខ្ញុំ ក៏គ្មានអ្វី ដែលត្រូវខាតបង់លេីសពីនេះ ទៀតដែរ។ ក្រោយពីពុក បង្ហោះហេីយ សង្ឃឹមថា សារសន្ទនានេះ នឹងក្លាយជាមេរៀនសម្រាប់មនុស្សជំនាន់ថ្មី ដេីម្បីសិក្សារៀនសូត្រ អំពីបច្ចេកទេស និងសិលធម៌ នៃការសន្ទនា ដែលអាចជាមេរៀន ជួយការពារពួកគេ ឲ្យគេចពីការធ្លាក់ចូលអន្ទាក់ចារកម្ម បានផងដែរ។
ខ្ញុំទទួលស្គាល់ថា ខ្ញុំគ្មានសារសន្ទនាពេញតាំងពីឆ្នាំ២០២១ រហូតដល់បច្ចុប្បន្នទេ។ ទី១ ដោយសារមិនទម្លាប់ដូរលេខតេឡេក្រាម ដូចពុក ទី២ ខ្ញុំមិនទម្លាប់ថត និងបញ្ចេញសារសន្ទនា រវាងបុគ្គលពីរនាក់ ទឲ្យទៅបុគ្គលទី៣ ដឹងនោះទេ។ ខ្ញុំ អាចរាងព្រហេីនបន្តិច ក្នុងការដេីរឆ្លងបន្ទាត់ក្រហម របស់ពុក ប៉ុន្តែខ្ញុំមិនអាចដេីរឆ្លងបន្ទាត់ក្រហម ដែលជា សិលធម៌មូលដ្ឋានបានឡេីយ។
ពុកដឹងទេ នៅពេលពុក បញ្ចេញសារ ក្នុងចេតនាកំទេច ខ្ញុំហេីយ តែខ្ញុំ បន្តនៅហៅពុក ថាពុកពេញៗមាត់ មានមនុស្សច្រេីនណាស់ ជេរប្រមាថខ្ញុំថា គេធ្វេីបាបខ្លួនប៉ុណ្ណឹងហេីយនៅហៅពុកទៀត? តែខ្ញុំ មិនខ្វល់ទេ ខ្ញុំនឹងបន្តហៅពុក រហូតដល់ថ្ងៃខ្ញុំស្លាប់ សម្រាប់ខ្ញុំ ពុកមួយថ្ងៃ គឺពុកមួយជីវិត។
ខ្ញុំ សូមប្រកាសជំហរ ខ្ញុំម្តងទៀតថា នៅពេលដែលខ្ញុំ មានឱកាស អាចកសាងកេរ្ត៍ឈ្មោះ មកវិញបាន អាចកសាងកំលាំងនយោបាយបាន ពុកនៅតែជាសត្រូវនយោបាយ ទីមួយខ្ញុំ។
ពីកូន សេង សារី
