អភិបាលខេត្តត្បូងឃ្មុំ ណែនាំឱ្យសមត្ថកិច្ច ត្រូវពង្រឹងការថែរក្សាសុខសុវត្ថិភាព ជូនពលរដ្ឋ 

ខេត្តត្បូងឃ្មុំ ៖ នៅក្នុងកិច្ចប្រជុំគណៈបញ្ជាការឯកភាពរដ្ឋបាល ខេត្តត្បូងឃ្មុំ លោក ប៉ែន កុសល្យ អភិបាលនៃគណៈអភិបាល ខេត្តត្បូងឃ្មុំ និងជាប្រធានគណៈបញ្ជាការឯកភាពរដ្ឋបាលខេត្ត  បានណែនាំដល់មន្ត្រីមានសមត្ថកិច្ចទាំងអស់ ត្រូវពង្រឹងលើកិច្ចការងារ ថែរក្សាសន្តិសុខសណ្តាប់ធ្នាប់ជូន ប្រជាពលរដ្ឋឱ្យបានល្អ។ ក្នុងនោះ ក៏ត្រូវរួមគ្នាផ្សព្វផ្សាយលទ្ធផលការងាររីកចម្រើន របស់រដ្ឋបាលខេត្ត ដែលសម្រេចបាន នាពេលកន្លងមក។

លោក ប៉ែន កុសល្យ មានប្រសាសន៍ថា  កិច្ចប្រជុំនេះ មានគោលបំណង ដើម្បីត្រួតពិនិត្យរបាយការណ៍ សកម្មភាពការងារ របស់អាជ្ញាធរមូលដ្ឋាន ឱ្យបានត្រឹមត្រូវ ក្នុងការធានា ឱ្យបានរាល់សកម្មភាពការងារនៅតាម មន្ទីរ-អង្គភាព ក្រុង-ស្រុក និងស្ថាប័នពាក់ព័ន្ធ។ ក្នុងនោះការងារពង្រឹងសុខសុវត្ថិភាព  និងសណ្តាប់ធ្នាប់សាធារណៈ ត្រូវតែបន្តធ្វើឱ្យបានល្អ ពិសេសក្នុងកម្មវិធីទទួលថ្នាក់ដឹកនាំសំខាន់ៗ អញ្ជើញមកប្រារព្ធពិធីផ្សេងៗ ទូទាំងខេត្ត។

កងកម្លាំងទាំង៣ប្រភេទ ត្រូវយកចិត្តទុកដាក់ឲឱ្យបានខ្ពស់ ចំពោះបញ្ហាសន្តិសុខ សណ្ដាប់ធ្នាប់សាធារណៈ សុខសុវត្ថិភាព ក្នុងពិធីប្រកាសទទួលស្គាល់ជាផ្លូវការ លទ្ធផលការងារសាខាសមាគមនារី កម្ពុជា ដើម្បីសន្តិភាព និងអភិវឌ្ឍន៍ ខេត្តត្បូងឃ្មុំ ឆ្នាំ២០២៤ និងលើកទិសដៅឆ្នាំ២០២៥ ក្រោមអធិបតីភាពដ៏ខ្ពង់ខ្ពស់ សម្តេចកិត្តិសង្គហបណ្ឌិត ម៉ែន សំអន ឧត្តមប្រឹក្សាផ្ទាល់ ព្រះមហាក្សត្រ និងជាប្រធានសមាគមនារីកម្ពុជាដើម្បីសន្តិភាព និងការអភិវឌ្ឍន៍ នៅថ្ងៃទី២៣ ខែកុម្ភៈ ឆ្នាំ២០២៥ ខាងមុខនេះ ឱ្យប្រព្រឹត្តទៅដោយរលូន ទទួលបានសុវត្ថិភាពខ្ពស់។

ជាមួយគ្នានោះលោក  ប៉ែន កុសល្យ ក៏បានស្នើឱ្យថ្នាក់ដឹកនាំ និងមន្ត្រីរាជការទាំងអស់ រួមគ្នាគិត រួមគ្នាធ្វើ ដើម្បីរដ្ឋបាលខេត្តត្បូងឃ្មុំ ទាំងមូល។ ពិសេសក្រើនរំលឹកដល់ អ្នកពាក់ព័ន្ធទាំងអស់ពីថ្នាក់ខេត្ត ដល់ភូមិ បន្តខិតខំជំរុញការអភិវឌ្ឍក្នុងមូលដ្ឋាន ឱ្យល្អប្រសើរ ការពារឱ្យមានសុខដុមរមនា ផ្លូវកាយ និងផ្លូវចិត្ត តម្កល់ទុក នូវផលប្រយោជន៍ប្រជាពលរដ្ឋជាធំ។

សម្រាប់រដ្ឋបាលឃុំ សង្កាត់ ត្រូវធ្វើឱ្យមានភាពច្បាល់លាស់លើរបាយការណ៍សម្រាប់គម្រោងអភិវឌ្ឍន៍ភូមិ ឃុំ សង្កាត់ ដើម្បីធានាឱ្យបាននូវការអភិវឌ្ឍឱ្យចំគោលដៅ និងគោលបំណងប្រជាពលរដ្ឋ៕