រថភ្លើងដាច់ទូ ក្រឡាប់ដោយខ្លួនឯង នៅវាលរេញ ខេត្តព្រះសីហនុ
ខេត្តព្រះសីហនុ ៖ សមត្ថកិច្ចនគរបាលចរាចរណ៍ បានឱ្យដឹងថា មានករណីគ្រោះថ្នាក់ចរាចរណ៍ រថភ្លើងដាច់ទូ ក្រឡាប់ខ្លួនឯង នៅម៉ោងប្រមាណ ០៥ល្ងាចថ្ងៃទី០៩ ខែសីហា ឆ្នាំ២០២៤ លើដងផ្លូវដែក ក្បែរចំណុចចំណតរថភ្លើង វាលរេញ ស្ថិតនៅភូមិសំរុងក្រោម ឃុំសំរុង ស្រុកព្រៃនប់ ខេត្តព្រះសីហនុ ។
សមត្ថកិច្ចអោយដឹងថា រថភ្លើង០១ខ្សែ នេះ ជាប្រភេទដឹកទំនិញ ពណ៌ទឹកប៊ិចលាយក្រហមឆ្នូតលឿង បិទលេខសម្គាល់លេខ 6535 ដែលមានទិសដៅពី ខេត្តព្រះសីហនុ ឆ្ពោះទៅខេត្តកំពត បើកបរដោយឈ្មោះ សាក់ វ៉ាន់ឌី ភេទប្រុស អាយុ ៤២ឆ្នាំ មុខរបរបើកបររថភ្លើង ស្នាក់នៅក្នុងក្រុមហ៊ុន ROYAL RAILWAY ហើយរថភ្លើងខាងលើ ជាកម្មសិទ្ធរបស់ក្រុមហ៊ុន ROYAL RAILWAY ។
សមត្ថកិច្ច បន្តថា លុះមកដល់ចំណុចកើតហេតុខាងលើ ដែលមានស្ថានភាពផ្លូវចុះចំណត និងរថភ្លើងមានល្បឿនលឿន ពេលមកដល់ចំណុចផ្លូវកោង បណ្ដាលឱ្យធ្លាក់ទៅខាងស្ដាំ រួចបានដាច់ទូរថភ្លើងពាក់កណ្ដាល ហើយក្បាលរថភ្លើង មិនទាន់អស់ល្បឿន បានឈប់ឃ្លាតពីកន្លែងកើតហេតុប្រហែល ៤០០ម៉ែត្រ ទើបរថភ្លើងឈប់តែម្ដង ។
ករណីគ្រោះថ្នាក់ចរាចរណ៍នេះ មិនបណ្ដាលឱ្យមានមនុស្សរងរបួសឡើយ ខូចខាតផ្លូវដែក និងធ្លាក់ទូកុងតឺន័រ ចំនួន០៤ទូ ។
បច្ចុប្បន្ន រថភ្លើងខាងលើ កំពុងឈប់នៅក្បែរស្ថានីយ៍រថភ្លើង ឃុំសំរុង ដោយរង់ចាំខាងក្រុមហ៊ុន រករថយន្ដស្ទួចទូចេញពីកន្លែងកើតហេតុ ៕
