សាឡង់បូមខ្សាច់សមុទ្រ ខ្នាតយក្ស៣គ្រឿង កំពុងធ្វើសកម្មភាព ក្នុងតំបន់រ៉ាមសា កោះកាពិ
ខេត្តកោះកុង ៖ សាឡង់បូមខ្សាច់ខ្នាតយក្សចំនួន ៣គ្រឿង ដែលគេស្គាល់ថា ជាកម្មសិទ្ធ ឈ្មួញឈ្មោះ បុក ត្រូវបានកម្លាំងសមត្ថកិច្ច និងអង្គការអន្តរជាតិសហការចុះបង្ក្រាប ដោយឃាត់ខ្លួនកម្មករជាច្រើននាក់ យកមកសាកសួរ..។
សកម្មភាពចុះបង្ក្រាបនេះ ធ្វើឡើង នៅយប់ថ្ងៃទី១៥ ខែមករា ឆ្នាំ២០២៥ នៅចំណុចតំបន់រ៉ាមសា កោះកាពិ ស្ថិតក្នុងភូមិជ្រោយប្រស់ ឃុំជ្រោយប្រស់ ស្រុកកោះកុង ខេត្តកោះកុង។
ប្រភពពីប្រជាពលរដ្ឋ បានឲ្យដឹងថា សកម្មភាពបូមខ្សាច់ របស់សាឡង់ទាំង ៣គ្រឿងនោះ ធ្វើឡើងទាំងយប់ទាំងថ្ងៃ អស់រយៈពេលច្រើនខែ កន្លងមកហើយ ដោយបូមខ្សាច់នៅតាមដៃសមុទ្រទឹកប្រៃ។
យ៉ាងណា សារព័ត៌មានយើង ក៏នៅមិនទាន់អាចទាក់ទង លោកស្រី មិថុនា ភូថង អភិបាលខេត្តកោះកុង ដើម្បីបំភ្លឺករណីខាងលើ បាននៅឡើយទេ។ ខណៈ លោក ហ៊ុន ម៉ារ៉ាឌី ប្រធានមន្ទីរបរិស្ថានខេត្ត កោះកុង បានបញ្ជាក់ខ្លីថា មិនទាន់មានការអនុញ្ញាតពី ថ្នាក់ដឹកនាំក្រសួងបរិស្ថាន មិនអាចនិយាយបានទេ..។
ទោះជាបែបនេះក្តី មន្ត្រីមិនបង្ហាញអត្តសញ្ញាណម្នាក់ បានឲ្យដឹងថា ក្រុមសាឡង់បូមខ្សាច់ខ្នាតយក្សទាំង ៣គ្រឿង ខាងលើនេះ គឺបានសុំច្បាប់អនុញ្ញាត បូមខ្សាច់តែ ១ទីតាំងទេ ប៉ុន្តែបែរជា បានលួចលាក់ធ្វើសកម្មភាពបូមខ្សាច់ ជាច្រើនកន្លែងទៀត។ ហើយ ករពីនេះ ខាងមន្ត្រីជំនាញ ក៏កំពុងពិនិត្យ និងឈានទៅបន្តអនុវត្តនីតិវិធី តាមច្បាប់ជាបន្តទៀត៕ ប្រភព ៖ CNN NEWS
