ចិនដេញបាញ់គ្នា កក្រើកក្រុងព្រះសីហនុទាំងព្រឹក ប៉ូលិសស្ទុះជាន់ជើងគ្នាចុះបង្ក្រាប

ក្រុងព្រះសីហនុ ៖ សមត្ថកិច្ចនគរបាលមូលដ្ឋាន បានឱ្យដឹងព័ត៌មានបឋមថា នៅព្រឹកថ្ងៃទី៤ ខែកុម្ភៈនេះមានករណីផ្ទុះអាវុធ រវាងជនជាតិចិន បាញ់ជនជាតិចិនដូចគ្នា នៅក្នុងបរិវេណទីតាំងកាស៊ីណូ មួយកន្លែង ស្ថិតក្នុងក្រុងព្រះសីហនុ បណ្តាលឱ្យរងរបួសធ្ងន់ បញ្ជូនទៅសង្គ្រោះនៅមន្ទីរពេទ្យ។

ភ្លាមៗក្រោយកើតហេតុ សមត្ថកិច្ចចម្រុះ ក៏បានចុះទៅដល់កន្លែងផ្ទុះអាវុធ នៅម៉ោងជាង ៧ព្រឹក ថ្ងៃទី៤ ខែកុម្ភៈ ឆ្នាំ២០២៥ មានទៅតាំងនៅជាប់ មន្ទីរគណបក្សប្រជាជនកម្ពុជា ស្ថិតក្នុងសង្កាត់លេខ១ ក្រុង-ខេត្តព្រះសីហនុ។

សមត្ថកិច្ច នគរបាលសង្កាត់១ បានឱ្យដឹងថា ហេតុការណ៍ផ្ទុះអាវុធនេះ បណ្តាលឱ្យជនជាតិចិនម្នាក់ រងរបួស ធ្ងន់ ត្រូវបានបញ្ជូនយកទៅសង្គ្រោះនៅមន្ទីរពេទ្យ ហើយជនជាតិចិនមួយចំនួនទៀត ដែលត្រូវជាបក្ខពួក សមត្ថកិច្ច កំពុងបន្តចុះស្រាវជ្រាវ ឈានទៅឃាត់ខ្លួន មកផ្តន្ទាទោស។

យ៉ាងណា គេហទំព័រ “កម្ពុជាថ្ងៃនេះ” នីមិនទាន់អាច សុំការបញ្ជាក់បន្ថែមពី លោក ស៊ុំ គារ៉ាវុធ នាយប៉ុស្តិ៍នគរបាល រដ្ឋបាលសង្កាត់លេខ១ បាននៅឡើយទេ នៅព្រឹកថ្ងៃទី៤ ខែកុម្ភៈនេះ ដោយលោកបញ្ជាក់ខ្លីថា កំពុងដឹកនាំកម្លាំង ចុះស្វាវជ្រាវបទល្មើសខាងលើនេះ។

ដោយឡែក អធិការនគរបាលក្រុងព្រះសីហនុ លោក តី វិសាល ក៏មិនទាន់ធ្វើអត្ថាធិប្បាយជុំវិញ ករណីជនជាតិចិន ប្រើអាវុធ បាញ់ ឲ្យជនជាតិចិនដូចគ្នាម្នាក់ រងរបួសនេះដែរ ដោយឆ្លើយខ្លីថា កំពុងជាប់រវល់ប្រជុំ..៕