រដ្ឋបាលខេត្តកំពង់ចាម បើកកិច្ចប្រជុំ ដើម្បីបង្ការទប់ស្កាត់ បទល្មើសគ្រប់ប្រភេទ

ខេត្តកំពង់ចាម ៖ លោក ជួន សុវណ្ណ រដ្ឋមន្ត្រី ប្រតិភូអមនាយករដ្ឋមន្ត្រី និងលោក អ៊ុន ចាន់ដា អភិបាល នៃគណៈអភិបាលខេត្តកំពង់ចាម និង ជាប្រធានគណៈបញ្ជាការឯកភាពរដ្ឋបាលខេត្ត បានដឹកនាំកិច្ចប្រជុំគណៈបញ្ជាការឯកភាព រដ្ឋបាលខេត្ត ដើម្បីបង្ការទប់ស្កាត់ និងបង្ក្រាបរាល់បទល្មើសគ្រប់ប្រភេទ ក៏ដូចជាដើម្បីក្តាប់សភាពការណ៍ទូទៅ នៅទូទាំងខេត្តកំពង់ចាម ប្រយោជន៍ធានាសុខសុវត្ថិភាព ជូនប្រជាពលរដ្ឋ ខណៈពិធីនេះ ធ្វើនៅថ្ងៃទី១៩ ខែកុម្ភៈ ឆ្នាំ២០២៥។

លោក អ៊ុន ចាន់ដា ប្រធានគណៈបញ្ជាការឯកភាពខេត្ត បានណែនាំដល់អាជ្ញាធរដែនដី គ្រប់លំដាប់ថ្នាក់ទូទាំងខេត្ត ត្រូវបង្ក្រាបរាល់បទល្មើសគ្រឿងញៀន ល្បែងស៊ីសងខុសច្បាប់គ្រប់ប្រភេទ នេសាទត្រីខុសច្បាប់ ពិសេសល្បែងស៊ីសង តាមអនឡាញ ឱ្យខានតែបាន ក្នុងភូមិសាស្ត្រខេត្តកំពង់ចាម។ ក្នុងនោះគណៈបញ្ជាការឯកភាពខេត្ត ក៏ត្រូវពង្រឹង និងបង្កើនសមត្ថភាពទ្វេឡើង លើការអនុវត្តគោលនយោបាយភូមិ ឃុំ សង្កាត់ មានសុវត្ថិភាព ឲ្យកាន់តែមានប្រសិទ្ធភាព។

លោកអភិបាលខេត្ត បន្ថែមថា ត្រូវអនុវត្តតាមបទបញ្ជា របស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា, គណៈបញ្ជាការឯកភាពរដ្ឋបាលខេត្តកំពង់ចាម បានបង្កើតក្រុមការងារចុះចាត់វិធានការ ត្រួតពិនិត្យ និងបិទល្បែងស៊ីសងគ្រប់ប្រភេទ ក្នុងភូមិសាស្ត្រខេត្ត ដោយបានចាប់ផ្ដើមយុទ្ធនាការ ពីថ្ងៃទី១៦ ខែកុម្ភៈ ឆ្នាំ២០២៥ ដោយស្រង់ស្ថិតិទីតាំងល្បែងនៅគ្រប់ក្រុង ស្រុក ឃុំសង្កាត់ និងដាក់វិធានការធ្វើកិច្ចសន្យា ឱ្យបញ្ឈប់ល្បែងស៊ីសងគ្រប់ប្រភេទ។

នាឱកាសនោះ លោករដ្ឋមន្ត្រីប្រតីភូ ជួន សុវណ្ណ បានសំណូមពរឱ្យរដ្ឋបាលខេត្តកំពង់ចាម ត្រូវបន្តកិច្ចប្រតិបត្តិការធ្វើយ៉ាងណា ឱ្យបទល្មើសគ្រឿងញៀន ត្រូវថយចុះបន្ថែមទៀតពីព្រោះគ្រឿងញៀន ធ្វើឱ្យមនុស្សប្រព្រឹត្តទៅមានការបាត់បង់ស្មារតីធ្វើឱ្យបង្កើតបាន នៅបទល្មើសចោរកម្មឆក់ប្លន់ ដែលបង្កអសន្តិសុខ ធ្វើឱ្យ ប្រជាពលរដ្ឋ រស់នៅមានការភ័យខ្លាច។

បញ្ហាល្បែងស៊ីសង មិនមែនទើបតែកើតមានក្នុងបច្ចុប្បន្ននេះទេ សូម្បីតែសម័យសម្ដេចតេជោ ហ៊ុន សែន ជានាយករដ្ឋមន្ត្រី សម្ដេចបានដាក់បទបញ្ជាយ៉ាងម៉ឺងម៉ាត់បំផុត ឱ្យបង្ក្រាបល្បែងស៊ីសង នៅទូទាំងប្រទេស រហូតមកដល់ អាណត្តិទី៧ ដែលមានសម្ដេចធិបតី ហ៊ុន ម៉ាណែត នៅតែបន្តដាក់វិធានការ ក្នុងការបង្ក្រាបល្បែងស៊ីសងទូទាំងប្រទេសនេះផងដែរ។  ដូច្នេះ សមត្ថកិច្ចគ្រប់ជំនាញ ត្រូវតែបន្តចុះស្រាវជ្រាវ និងទប់ស្កាត់តាមគ្រប់រូបភាព ដោយមិនត្រូវឱ្យបញ្ហាទាំងអស់ ក្លាយជាទុក្ខកង្វល់ របស់ប្រជាពលរដ្ឋនោះទេ៕